أحمدك ربي
فقلبي لا زال ينبض ....
يوم الاربعاء الساعه 6 مساءا جاءنى اتصال من صديقه لى تخبرنى انها ستسافر الى السعوديه بسيارتهم من الكويت لاداء فريضه العمره وجرى هذا الحوار
أمنيه : بوسي انا هسافر كمان ساعتين علشان العمره ان شاء الله محمد اخيرا عرف يطلع التأشيره وهنسافر بعد ما يجي من الشغل على طول
بوسي: بجد طب خير بس ليه تسافروا دلوقتى ماتسافروا الفجر علشان يكون محمد ريح شويه
امنيه : خير البر عاجله وانتى عارفه الجو وحش وعايزين نسافر بالليل افضل
بوسي: طب ربنا يوصلكم بالسلامه يارب مش تنسينا من الدعاء لى ولاحمد بالذريه الصالحه وان ربنا يهدينا جميعا وخصوصا عمر لانه بقي شقي جدا
أمنيه : حرام عليكى ابنك مؤدب جدا تعالى شوفى اللى عندى حمزه وعمر مجننينى هم الاتنين
بوسي: حرام عليكى حمزه اللى لسه مكمل سنه الاسبوع اللى فات البرئ تقولى عليه كده سبحان الله الولد ده من ساعه ما
اتولد وعمرى ما شوفته بيبكى وابتسامته تملأ وجهه دايما بجد بحس فيه بسماحه جميله قوى ربنا يحيمه بس عمر الكبير الله يعينك عليه هو كمل ست سنين ولا لسه ؟؟؟؟؟
أمنيه : لا فى شهر 8 هانت يعنى كلها اربع شهور ويكملهم ان شاء الله ويالا اشوفك على خير عايزه الحق اخلص قبل ما محمد يرن على بعد ما يجي من الشغل وهنزل انا والاولاد وهو هيطلع ياخد الشنط
بوسي: ربنا يجيبكم بالسلامه المهم اول ما توصلوا جيبوا رقم سعودى وطمنونا ها منتظرينكم وان شاء الله عمره مقبوله
امنيه : ان شاء الله سلام بقي اشوفك ان شاء الله الاتنين الجاى
اغلقت الخط واخبرت زوجى وشاركنى فى الرأى انهم كانوا مفروض يستنوا على الاقل محمد يريح دى مسافه اكتر من 20 ساعه لمكه والله يعينهم يارب ويوصلوا بالسلامه
بوسي: عايزين نعمل عمره يا احمد
احمد: ان شاء الله بس ربنا يسهل وظروف شغلى تتظبط ونروح ان شاء الله
بوسي: بالسياره .......؟؟؟؟
احمد: لا طبعا سياره ايه .............. طيران ان شاء الله
فى يوم الجمعه وعلى الساعه 4 عصرا اتصلت اختى لتقول لى خبرا لم اكاد اسمعه والا ارتعش جسدى واغرورقت عينى اغلقت الخط معها وزوجى رأنى وانا ابكى بحرقه فجلس لجوارى لا يعرف لماذا ابكى
احمد: ايه يا بنتى مالك اختك ضايقتك ولا ايه ؟؟؟؟؟؟؟
بوسي: امنيه ماتت يا احمد امنيه ماتت
اجهشت بالبكاء لم اعد استطيع ان اتمالك نفسي كان زوجى يصبرنى
بوسي: مش قادره اصدق انى مش هشوفها تانى
احمد: ادعيلها بس بالمغفره ومحمد والاولاد عاملين ايه .....وماتت ازاى .....حصل ايه ؟؟؟
بوسي: محمد عمل حادثه بالعربيه بيقولوا اتقلبت على الطريق وانفجرت واللى جواها ماتوا....
احمد : ايه.........! ومحمد مات !!!!!!!
بوسي: امنيه ماتت الاول ومحمد نقلوههم والعيال المستشفي بس الحروق فى جسمهم كانت من الدرجه العليا فمات عمر ثم حمزه ثم محمد
احمد : يالله ....يالله رحماك شاف اسرته كله بتموت قدامه .......ربنا يرحمهم يارب ويغفرلهم وارحمنا من موت الفجأه يارب قومى صلي ركعتين وانا كمان هقوم واصلي ركعتين وادعيلهم بالمغفره
بوسي: احمد ....انا كده مش هشوف امنيه تانى انا حاسه انى سامعه صوتها بيرن فى ودانى وهى بتضحك وحاسه انى شايفه ابتسامه حمزه لا انا مش قادره اللهم احسن خاتمتنا يارب اللهم امين
واجد نفسي غير مصدقه ابكى بحرقه على فقدان صديقه اعتبرتها اختى واكثر فلقد كانت نعمه الصديقه لصديقتها كانت منتقبه تعرف المولى عز وجل جيدا وفعلا صدقت ان الله حينما يحب انسان يأخذه الى جواره لم ارى عليها الا الصلاح هى وزوجها كان الاذان يأذن ونحن جالسون فنجد زوجها يهم لصلاه الجماعه بسرعه وتنتظره هى ثم تذهب هى لتصلي حتى لايفوتها ميعاد الصلاه كان يومي الخميس والاتنين دائما ما يكونوا صائمين فلا نستطيع ان نخرج معهم كانت خيره بكل ماتحمله الكلمه لا اصدق انى لن اراها .....لن اراها بعد الان وابنها لن يلعب مع ابنى ولن استطيع حمل حمزه الصغير ذوالابتسامه الصافيه اللهم اجعل هؤلاء الاطفال يصرخون باسم والديهم يوم العرض عليك اللهم ادخلهم جنتك برحماك ياارحم الراحمين اللهم انى اشهدك انى قد سامحتها على اى شئ يخصنى قد قالته عنى فى غيابي ولو انى اعلم انها لن تقول فلسانها رطب بذكرك اللهم انى استغفرك واتوب اليك اللهم اغفر لهم وارحمهم ويسر امورهم ولا تجعل قبضه القبر عليهم قويه اللهم يسر لهم عند سؤال الملكين اللهم اجعل لسانى رطبا بذكرك
أخوانى واخواتى
اوصيكم ونفسي بتقوى الله فالدنيا ساعات قليله وفانيه ولكن الاخره ابقي فأجعل الدنيا ممر لك للجنه وانتفع بها ولا نعرف اذاكان ستكون هناك لحظات من عمرنا ام ستكو ن هذه لحظتنا الاخيره اللهم احسن خاتمتنا
ويسرامورنا ولا تعقد لساننا يوم سؤال الملكين وادخلنا الجنه برحماك يالله ياراحم الراحمين .
يقول الله عز وجل" وجاءت سكرة الموت بالحق ذلك ما كنت منه تحيد ".
تمت
بوسي
